Toni al capis!

O indaghi
su la sparizion di Rovul.

1. Forsi lu àn robât,
2. o pûr si è disintegrât
3. o pûr al à fat sù une machine dal timp par tornâ intal passât.

Ma nin par ordin...
Vuê di matine o jeri ancjemò tal jet intal cjaldut sot da lis cuviertis,
cuant che il telefonin al à sunat.

Jo mi stavi insumiant un gjelât ae creme.

Driiin

O ai fat un salt.
O soi lât a rispuindi: “Cui isal?”
“Bundì, Toni! Jo o soi la archeologhe Ninine.”
“Bundì, Ninine! Ce puedio fâ par te?”
“Scuse se ti disturbi, ma e je sucedude une robe brute! Vuê di matine o soi rivade inta la Universitât di Udin par esaminâ il scheletri “Rovul”, ma Rovul nol è plui e intal laboratori al jere dut a puest. O ai bisugne di te! Ti spieti!”
Jo i ai rispuindût che le varès judade a cjatâ il scheletri Rovul.

Mi soi fat la doce e mi soi cambiât di investigatôr.
O soi lât sù ta la mê machinute rosse
e o soi lât ta la Universitât di Udin
cu la mê lint di ingrandiment
e la mê borse
par fâ il gno lavôr di investigatôr.

O soi jentrât
e o ai clamât la mê coleghe
par bevi insiemit un cafè esprès par rilassâmi.
Mi soi fat puartâ un gjornâl.

Par un moment mi soi incjantât...
intal gjornâl e jere la fotografie di Rovul che al cjaminave pa lis stradis!!!
“Ma e je une robe IMPUSSIBILE!!!!” o ai dit.

Rovul al è preziôs e i gjornaliscj imbacuchîts lu àn fotografât parcè che e je la prime volte che a viodin un scheletri che al vîf!

Subit o ai pensât chestis ipotesis

1.Forsi i gjornaliscj a àn publicât une foto false.
2.Forsi Rovul al è picjât intun fîl.
3.Forsi chel li al è un robot.
4.Forsi chel che lu à robât al à fat une magjie par fâ tornâ in vite Rovul.
5.Forsi i laris a àn lassât Rovul e lui al torne inte Universitât di Udin.
6.Forsi si è rianimât, al è ator a cjoli i imprescj par fa sù une machine dal timp, ma si è fat scuvierzi e il gjornalist che lu à viodût i à fat une foto.

"Une di chestis e je chê juste. Mi coventin elements par capî!" o
ai pensât.

Cussì cumò o soi chi intal laboratori.
O viôt talpadis che mi samein in ponte di pîts. O cjol la mê lint e o controli dutis lis olmis ancje su la strade. O cjati dongje da lis talpadis piçui tocuts di polvar di fier.

"O ai capît!" o dîs a la mê coleghe.

Secont te, ce aial capît Toni? Ce ipotesi i sameie juste?